عبداللہ شاہ غازی ؒ کا تین روزہ عرس آج سے شروع ہوگا ملک بھر سے زائرین کی آمد

مزار کے اطراف پولیس اور رینجرز کی بھاری نفری تعینات ہوگی، عرس کا افتتاح قائم مقائم گورنر آغا سراج درانی کریں گے

Nasiruddin October 26, 2013

حضرت عبداللہ شاہ غازی ؒکے عرس کی تقریبات کے سلسلے میں مزار شریف کو قمقموں سے خوبصورتی سے سجایا گیا ہے(فوٹو ایکسپریس)

حضرت عبداللہ شاہ غازیؒ کے 1283ویں عرس کی 3 روزہ تقریبات کا آغاز آج ہفتہ کو ہوگا۔

مزار کے اطراف پولیس و رینجرز کی بھاری نفری کو تعینات کیا جائے گا، ملک بھر سے زائرین کی آمد کا سلسلہ شروع ہوگیا ہے، عرس کا افتتاح قائم مقائم گورنر سندھ آغا سراج درانی کریں گے، مزار پر پھولوں کی چادر چڑھائیں گے اور فاتحہ خوانی کریں گے، اس موقع پر مشیر اوقاف ضیا الحسن، سیکریٹری رمضان اعوان، چیف ایڈمنسٹریٹر عبدالرحمن چنہ، ایڈمنسٹریٹر اوقاف کراچی نصرت خان، منیجر عبداللہ شاہ غازی، خطیب مفتی منیراحمد طارق بھی موجود ہوں گے، وزیراعلیٰ سندھ سید قائم علی شاہ عرس کی اختتامی تقریب سے خطاب کریں گے۔

عرس کے سلسلے میں تحفظ کے خصوصی انتظامات کیے جائیں گے، مزار پر زائرین کی جامہ تلاشی لی جائے گی اس کے بعد واک تھرو گیٹ سے گزار کر مزار پر جانے کی اجازت ہوگی، مزار کے احاطے میں محکمہ اوقاف کی جانب سے مفت طبی کیمپ، کنٹرول روم اور معلومات کیلیے انفارمیشن سینٹر قائم کیا جائے گا، محکمہ اوقاف سندھ نے عرس کے انتظامات کے سلسلے میں 20 لاکھ روپے فنڈز جاری کردیے۔

جبکہ ایڈمنسٹریٹر بلدیہ عظمیٰ کراچی ثاقب سومرو نے عرس کے آخری روزپیر 28 اکتوبرکو مقامی تعطیل کا اعلان کردیا ہے، عرس کے سلسلے میں صحافیوں سے گفتگو کرتے ہوئے سیکریٹری اوقاف محمد رمضان اعوان اور چیف ایڈمنسٹریٹر اوقاف سندھ عبدالرحمن چنہ نے کہاہے کہ اس سال عرس کے سلسلے میں تحفظ کے سخت انتظامات کو حتمی شکل دیدی گئی ہے، انھوں نے کہاکہ عرس کے موقع پر زائرین میں جو لنگر تقسیم کیاجائے گا وہی لنگر وی آئی پیز کو بھی پیش کیا جائے گا، انھوں نے کہا ہماری نظر میں درگاہ پر آنے والا ہر شخص وی آئی پی ہے۔