نیب راولپنڈی کی خواجہ آصف سے منی لانڈرنگ کیس میں تفتیش

گزشتہ برس خواجہ آصف کیخلاف منی لانڈرنگ تحقیقات کا حکم چیئرمین نیب نے عمران خان کی درخواست پر دیا تھا

حیدر نسیم/ April 09, 2019

سابق وزیر دفاع نیب راولپنڈی کی تفتیشی ٹیم کے سامنے پیش ہوئے۔ فوٹو : فائل

منی لانڈرنگ کیس میں سابق وزیر دفاع خواجہ آصف سے نیب راولپنڈی نے تفتیش کی اور بیرون ملک اثاثوں، بینک اکاؤنٹس سے متعلق ایک سوال نامہ بھی دیا گیا۔

ایکسپریس نیوز کے نمائندہ خصوصی کے مطابق سابق وزیر دفاع خواجہ آصف آج نیب راولپنڈی میں تحقیقاتی ٹیم کے سامنے پیش ہوگئے، نیب تفتیشی ٹیم نے خواجہ آصف کا بیان ریکارڈ کیا اور انہیں بیرون ملک اثاثوں سے متعلق ایک سوال نامہ بھی دیا گیا۔

ذرائع کے مطابق خواجہ آصف سے جائیداد کی تفصیلات، اثاثوں کے ظاہر شدہ ہونے، سال 2000 سے اثاثوں میں اضافے کی تفصیلات، اندورن اور بیرون ملک بینک اکاؤنٹس، بیرون ملک اثاثوں کی دستاویز سے متعلق سوالات کیے گئے۔

ذرائع کا کہنا ہے کہ سابق وزیر دفاع نے نیب کو جواباً بتایا کہ وہ کچھ دستاویزات اور ریکارڈ اپنے ساتھ لائے ہیں اور باقی ماندہ دستاویزات کو جلد پیش کرنے کی یقین دہانی بھی کرائی، جس پر نیب تفتیشی کمیٹی نے جواب تحریری طور پر قلم بند کرانے کی ہدایت کرتے ہوئے ضمنی سوال نامہ بھی دیا۔

یہ خبر بھی پڑھیں : خواجہ آصف پر منی لانڈرنگ کے الزامات؛ چیرمین نیب کا تحقیقات کا حکم

خواجہ آصف نے میڈیا سے گفتگو میں بتایا کہ نیب تفتیشی کمیٹی کے ساتھ اچھے ماحول میں چائے پی، کچھ زبانی پوچھ گچھ ہوئی اور نیب کی جانب سے تحریری سوال نامہ بھی دیا گیا ہے جنہیں ابھی میں نے دیکھا نہیں ہے۔ قانون اور آئین کا احترام کرتا ہوں اور ہر مرحلے میں تعاون جاری رکھوں گا۔

واضح رہے کہ گزشتہ برس چیئرمین نیب جسٹس (ر) جاوید اقبال نے وفاقی وزیر خواجہ آصف کے خلاف منی لانڈرنگ کے الزامات کی تحقیقات کا حکم دیا تھا۔ اُس وقت کے اپوزیشن رہنما اور تحریک انصاف کے چیئرمین عمران خان نے نیب کے سربراہ کو خط لکھ کر خواجہ آصف کے خلاف منی لانڈرنگ اور کرپشن کی تحقیقات کا مطالبہ کیا تھا۔