آغا سراج درانی کے بعد اب کس کی گرفتاری چہ میگوئیاں شروع

کچھ نہیں کہا جا سکتا کہ سندھ کی سیاست کیا رخ اختیار کرتی ہے۔

G M Jamali February 27, 2019

کچھ نہیں کہا جا سکتا کہ سندھ کی سیاست کیا رخ اختیار کرتی ہے۔ فوٹو: آن لائن

اسپیکر سندھ اسمبلی آغا سراج درانی کی قومی احتساب بیورو (نیب) کے ہاتھوں اسلام آباد میں ہونے والی گرفتاری کے بعد سندھ کی سیاست غیر یقینی کا شکار ہوگئی ہے۔ پاکستان پیپلز پارٹی کی قیادت اور سندھ حکومت ممکنہ چیلنجز سے نمٹنے کے لئے حکمت عملی تیار کر رہی ہیں۔ اب تو سندھ میں ایک ہی سوال کیا جا رہا ہے کہ آغا سراج درانی کے بعد کس کی باری ہے اور سندھ حکومت کا مستقبل کیا ہے؟

گزشتہ بدھ یعنی 20 فروری 2019ء کو آغا سراج درانی کو اسلام آباد میں نیب کی ٹیم نے گرفتار کر لیا ۔ یہ گرفتاری نیب کراچی کی ٹیم نے کی اور اس کی معاونت نیب راولپنڈی نے کی ۔ اسی دن آغا سراج درانی کا راہداری ریمانڈ حاصل کیا گیا اور انہیں کراچی منتقل کردیا گیا تاکہ انہیں اگلے روز نیب کی عدالت میں پیش کیا جا سکے لیکن اسی دن ایک ایسا واقعہ رونما ہوا، جس نے نہ صرف نیب کارروائیوں کے بارے میں سوالات پیدا کر دیئے بلکہ پیپلز پارٹی کو یہ موقع فراہم کردیا کہ وہ اس گرفتاری پر معاملے کو سیاسی رنگ دے سکے اور نیب کو دفاعی پوزیشن پر لاکھڑا کرے ۔

نیب کی ایک ٹیم نے کراچی کے علاقے زمزمہ (ڈیفنس) میں آغا سراج درانی کی رہائش گاہ پر چھاپہ مارا۔ گھر پر صرف خواتین اور بچے تھے۔ نیب کی ٹیم نے تقریباً سات گھنٹے تک گھر میں تلاشی لی۔ اس دوران گھر کے باہر سندھ حکومت کے وزراء اور مشیروں کے ساتھ ساتھ ارکان سینیٹ، قومی اور صوبائی، پیپلز پارٹی کے رہنماؤں اور کارکنوں نے احتجاجی دھرنا دیا۔ وہ نیب کی طرف سے خواتین اور بچوں کو مبینہ طور پر ہراساں کرنے اور حبس بے جا میں رکھنے پر احتجاج کر رہے تھے۔ پیپلز پارٹی کے رہنماؤں اور سندھ کابینہ کے ارکان نے الزام عائد کیا کہ نیب کے مرد اہلکاروں نے خواتین کے ساتھ بدزبانی کی اور ناروا سلوک کیا ۔

دوسرے دن جب آغا سراج درانی کو نیب کی عدالت میں پیش کیا گیا تو پیپلز پارٹی کے رہنماؤں اور کارکنوں کے ساتھ ساتھ سندھ کابینہ کے ارکان نے عدالت پہنچ کر آغا سراج درانی کے ساتھ یکجہتی کا اظہار کیا اور نیب کے خلاف نعرے بازی کی ۔ بعد ازاں وزیراعلیٰ سندھ سید مراد علی شاہ نے پیپلز پارٹی سندھ کے صدر نثار احمد کھوڑو اور دیگر رہنماؤں کے ساتھ سندھ اسمبلی بلڈنگ میں پریس کانفرنس کی اور اس بات پر افسوس کا اظہار کیا کہ وہ سندھ کے وزیراعلیٰ ہوتے ہوئے بھی آغا سراج درانی کے اہل خانہ کو تحفظ نہیں دے سکے۔ انہوں نے نیب پر دہشت گردی کا الزام عائد کیا اور کہا کہ نیب نے خواتین کے ساتھ بدتمیزی کی ۔

وزیراعلیٰ سندھ نے ایک سوال کے جواب میں کہا کہ وہ آج بھی اس بات کے حامی ہیں کہ کرپشن کے تدارک کا معاملہ آئین کے مطابق صوبے کا اختیار ہے ۔ سندھ سے نیب کے اختیارات کے خاتمے اور سندھ احتساب کمیشن کے قیام کے بل آئین کے مطابق تھے، جن پر میڈیا میں بہت تنقید ہوئی ۔ عدالت نے بھی ان بلوں کو تسلیم نہیں کیا ۔ سابق صدر آصف علی زرداری کی ہدایت پر یہ بل واپس لے لیے گئے لیکن وفاقی حکومت کو چاہیے کہ وہ نیب کی کارروائی کا نوٹس لے ۔ قومی اسمبلی اور سینیٹ نیب قوانین میں تبدیلی کریں۔

سندھ حکومت نے آغا سراج درانی کی گرفتاری کے بعد جمعہ 22 فروری کو سندھ اسمبلی کا اجلاس طلب کر لیا۔ یہ اجلاس 27 فروری تک ملتوی ہوا تھا ۔ ڈپٹی اسپیکر سندھ اسمبلی ریحانہ لغاری نے پروڈکشن آرڈر کے ذریعہ نیب کو حکم دیا کہ وہ آغا سراج درانی کو سندھ اسمبلی کے اجلاس میں شرکت کے لیے لے آئے۔ آغا سراج درانی کو نہ صرف سندھ اسمبلی لایا گیا بلکہ انہوں نے سندھ اسمبلی کے اجلاس کی صدارت بھی کی ۔

پاکستان کی پارلیمانی تاریخ کا شاید یہ پہلا واقعہ ہے کہ نیب کے قیدی اسپیکر نے اسمبلی اجلاس کی صدارت کی ۔ آغا سراج درانی نے سندھ اسمبلی کے اجلاس میں نہ صرف اپنے اہل خانہ کے ساتھ نیب ٹیم کے سلوک پر جذباتی ردعمل کا اظہار کیا بلکہ وزیراعلیٰ سندھ کو ہدایت کی کہ وہ اس معاملے کی تحقیقات کرائیں ۔ سندھ اسمبلی نے کثرت رائے سے آغا سراج درانی کے گھر پر نیب کے چھاپے کے خلاف قرارداد مذمت بھی منظور کی اور اس معاملے کی تحقیقات کا مطالبہ کیا ۔ قرارداد پر اظہار خیال کرتے ہوئے وزیراعلیٰ سندھ اور پیپلز پارٹی کے ارکان نے نیب پر زبردست تنقید کی ۔

اجلاس کے بعد سابق صدر اور پیپلز پارٹی کے شریک چیئرمین آصف علی زرداری نے سندھ اسمبلی بلڈنگ آ کر آغا سراج درانی سے ملاقات کی ۔ وہ کافی دیر تک وہاں رہے اور آئندہ کی حکمت عملی کے بارے میں ہدایات دیں ۔ آصف علی زرداری کا اسمبلی میں آنا اور ان کی آغا سراج درانی سے ملاقات ایک غیر متوقع واقعہ تھا ۔ اس کا مطلب یہ کہ پیپلز پارٹی آغا سراج درانی کے ساتھ کھڑی ہے ۔

پاکستان پیپلز پارٹی نے سندھ کے مختلف شہروں بشمول کراچی، حیدرآباد میں آغا سراج درانی اور ان کے گھر پر چھاپے کے خلاف احتجاجی مظاہرے کیے ۔ اسپیکر سندھ اسمبلی کی گرفتاری پر پیپلز پارٹی کی قیادت کے اس شدید ردعمل سے یہ قیاس آرائیاں کی جا رہی ہیں کہ حالات بہت غیر معمولی ہیں۔ کچھ نہیں کہا جا سکتا کہ سندھ کی سیاست کیا رخ اختیار کرتی ہے ۔