پی آئی اے اسپتالوں اور میڈیکل اسٹورز کی نادہندہ علاج معالجہ بند

انتظامیہ کی ناقص حکمت عملی کے باعث فنڈز ختم، بیمار ملازمین کو شدید پریشانی کا سامنا

آفتاب خان October 05, 2018

اسپتالوں اور میڈیکل اسٹورز کو واجبات کی ادائیگی کے بعد معاملہ حل کرلیا جائیگا، ترجمان۔ فوٹو: فائل

قومی ایئر لائن ملازمین کے علاج معالجے کے لیے مخصوص اسپتالوں اور میڈیکل اسٹورز نے دوائیوں کی فراہمی بند کردی۔

قومی ائیر لائن انتظامیہ اسپتالوں اورمیڈیکل اسٹورز کی نادہندہ ہوگئی، رقم کی عدم ادائیگی کی وجہ سے شہر کے مختلف اسپتالوں سے طبی سہولیات اور میڈیکل اسٹورز سے ادویات کی سہولتیں فراہم نہیں کی جارہیں۔

ذرائع کا کہنا ہے کہ پی آئی اے کے پینل پر شہر کے کچھ معروف اسپتالوں نے ملازمین کے علاج معالجے سے معذرت کرلی، پی آئی اے نے ہیڈآفس پر ڈسپنسری کے علاوہ شہر کے 10بڑے اسپتالوں اور طبی مراکز سے علاج معالجے کے لیے خدمات حاصل کررکھی ہیں،جبکہ لگ بھگ 12میڈیکل اسٹورز کے ساتھ دوائیوں کی فراہمی کے حوالے سے معاہدہ کررکھا ہے جب کہ چند ماہ قبل بھی عدم ادائیگی پر طبی مراکز سے علاج معالجے اورادویات کی فراہمی میں قومی ائیر لائن کے ملازمین کو دشواری کا سامنا کرنا پڑچکا ہے۔

واضح رہے کہ پی آئی اے میں موذی امراض کے شکار حاضرسروس وریٹائرڈ ملازمین موجودہ صورت حال سے زیادہ متاثرہورہے ہیں۔