خوابوں کی تعبیر

آپ کے خوابوں کی تعبیریں جانیے۔ فوٹو : فائل

---

شیر پلاٹ میں سو رہا ہے
چودھری احمد علی،خان پور
خواب-:میں نے خواب میں دیکھا کہ میرے گھر کے ساتھ ایک پرانا خالی پلاٹ ہے اور اس پلاٹ کے اندر ایک شیر سو رہا ہوتا ہے۔ میں اس پلاٹ کے قریب جاتا ہوں اور شیر کو دیکھ کر خوفزدہ ہوتا ہوں ۔ میں اس کے انتہائی قریب جاتا ہوں اور محسوس کرتا ہوں کہ شیر گہری نیند سو رہا ہوتا ہے پھر میں ایک دکان سے کچھ چیزیں خرید کر واپس گھر جاتا ہوں اور تسلی کرتا ہوں کہ شیر ابھی سو رہا ہوتا ہے ۔ پھر میری آنکھ کھل جاتی ہے۔

تعبیر-:یہ خواب اس بات کو ظاہر کرتا ہے کہ اللہ نہ کرے کوئی پریشانی آسکتی ہے، کوئی قریبی رشتہ دار یا دوست دشمنی کرنے کی کوشش کرے گا مگر اللہ تعالیٰ کی رحمت سے آپ محفوظ رہیں گے۔ کاروبار میں بھی کمی ہو سکتی ہے۔ آپ کے مال اور وسائل میں بھی کمی آ سکتی ہے۔ آپ نماز پنجگانہ ادا کیا کریں اور ہر نماز کے بعد کثرت سے یا سلام یا حفیظ کا ورد بھی کیا کریں اور ہر منگل یا ہفتہ کو کالے ماش، کالے چنے یا کالا کپڑا اپنے اوپر سے وار کر کسی مستحق کو دے دیں۔

موٹا بیل گھر کے اندر دیکھنا
طلحہ چودھری، میلسی
خواب:۔ میں نے خواب میں دیکھا کہ میری حویلی ہوتی ہے۔ کھیت سے ایک موٹاسا بیل گھر کے اندر آجاتا ہے۔ بیل کے آنے سے بچے شور مچا دیتے ہیں اور میں جلدی سے اس موٹے بیل کو بڑی مشکل سے اس کے سینگوں سے پکڑ کر باہر نکالتا ہوں اور پھر اس کو کھیت میں لے جاتا ہوں۔ اس کے بعد میری آنکھ کھل جاتی ہے۔

تعبیر:۔ اچھا خواب ہے جو اس بات کو ظاہر کرتا ہے کہ اللہ تعالیٰ کی مہربانی سے رزق میں اضافہ ہوگا مال مویشی میں برکت ہوگی۔ کاروبار میں اضافہ ہوگا جس سے مال اور وسائل دونوں میں بہتری آئے گی۔ گھر آباد ہوگا۔ عزت اور توقیر میں بھی اضافہ ہوگا۔ آپ نمازپنجگانہ ادا کیا کریں اور کثرت سے یاحی یاقیوم کا ورد بھی کیا کریں۔

خود کوبخار میں مبتلا دیکھنا
سرور خان ،لاہور
خواب : میں نے کچھ دن پہلے خواب دیکھا کہ میں اپنے کمرے میں بستر پر لیٹا ہوا ہوتا ہوں ، مجھے ایسا محسوس ہوتا ہے کہ مجھے سخت قسم کا بخار ہے جس کی وجہ سے مجھے سخت سردی کا احساس ہوتا ہے۔ میں ایک کمبل اپنے اوپر اوڑھ لیتا ہوں اور پھر مجھے تیزی سے پسنیہ آنا شروع ہو جاتا ہے اور میرا بدن کچھ بہتر ہونا شروع ہو جاتا ہے ۔ پھر میں اٹھ کر بیٹھ جاتا ہوں ۔ اس کے بعد میری آنکھ کھل جاتی ہے اس خواب کی کیا تعبیر ہوگی۔

تعبیر: اچھا خواب ہے جو اس بات کو ظاہر کرتا ہے کہ اللہ تعالی کی مہربانی سے آپ کو صحت اور تندرستی نصیب ہوگی۔ آپ کے کاروبار اور رزق میں برکت ہوگی آپ کی عمر میں اللہ تعالی برکت عطا فرمائیں گے۔ گھر میں آرام اور سکون ہوگا۔ بچوں سے محبت ہوگی اور بچے تابعداری کریں گے۔ آپ نماز پنجگانہ ادا کیا کریں اور کثرت سے یاحی یا قیوم کا ورد کیا کریں اور کچھ صدقہ اور خیرات بھی کریں ۔

بارش میں بھیگنا
نعمان۔ سکھر
خواب:۔میں ایک فلیٹ میں رہتا ہوں اور ہمارے ہاں الگ سے چھت تو نہیں ہوتی مگر ایک مشترکہ چھت ہوتی ہے۔ میں نے خواب دیکھا کہ میں ایک دن شام کے وقت چھت پر بیٹھا ہوں جو کہ کافی بڑی ہے۔ ایک دم سے سورج بادلوں میں چھپ جاتا ہے اور تیز ہوا چلنے لگتی ہے۔ دیکھتے ہی دیکھتے سارے آسمان کو بادل ڈھانپ لیتے ہیں اور تیز بارش ہونے لگتی ہے۔ باقی کچھ اور لوگ جو میرے ساتھ چھت پر کھڑے تھے، وہ بھاگ کر نیچے چلے جاتے ہیں اور میں وہیں کھڑے بارش میں بھیگتا ہوں۔ پھر ایک شیڈ کے سائے تلے کھڑا ہو کر بارش کا نظارہ کرتا ہوں۔

تعبیر:۔آپ کا خواب اچھا ہے جو اس بات کو ظاہر کرتا ہے کہ کاروبار میں خوب ترقی ہوگی جس کی وجہ سے آپ کے وسائل میں بہتری آئے گی۔ کچھ صدقہ و خیرات کریں اور یاحی یاقیوم کا وظیفہ کیا کریں۔

دروازے پر پردہ
افسری بیگم ۔ فیصل آباد
خواب: میں نے خواب میں دیکھا کہ کچھ سودا خریدنے کے لئے بازار جاتی ہوںاور جب میں سامان خرید کر بازار سے واپس آتی ہوں تو میں نے دیکھا کہ میرے گھر کے دروازے کے اوپر ایک خوبصورت پردہ پڑا ہوا ہوتا ہے۔ میں اس پردے کو دیکھ کر بہت پریشان ہو جاتی ہوں کہ کس نے پردہ ڈالا ہے، میں نے تو کبھی بھی دروازے پر پردہ نہیں لگایا تھا۔ مگر آج نہ جانے میرے گھر کے دروازے کے اوپر پردہ کون لگا گیا۔ میں اسی پریشانی میں سوچ رہی ہوتی ہوں تو پھر میری آنکھ کھل جاتی ہے۔

تعبیر: خواب اس بات کو ظاہر کرتا ہے کہ اللہ نہ کرے کوئی پریشانی خوف یا غم درپیش ہو سکتا ہے۔ یہ بھی ہوسکتا ہے کہ کوئی کاروباری راز پوشیدہ نہیں رہے گا۔ کچھ باتوں سے آپ کو کچھ حاصل نہیں ہو سکتا ۔ آپ کے مال اور وسائل میں کمی آسکتی ہے آپ نماز پنجگانہ ادا کیا کریں ۔ رات کو سونے سے پہلے نبی کریمؐ کی سیرت پاک کا مطالعہ کیا کریں اور کچھ اللہ کی راہ میں صدقہ خیرات کریں۔

مچھلیاں پکڑتا ہوں
محمد اسلم۔ اوکاڑہ
خواب:۔میں نے خواب میں دیکھا کہ میں اور میرا بھائی ایک دریا کے کنارے مچھلیاں پکڑ رہے ہیں۔ میرے کانٹے میں ایک مچھلی آجاتی ہے اور میں جلدی سے ڈوری کھینچ کر مچھلی کو کنارے پر رکھ دیتا ہوں۔ وہی مچھلی دوبارہ پانی میں چلی جاتی ہے۔ ایسا کئی بار ہوتا ہے کہ میں مچھلی کو نکالتا ہوں اور وہ دوبارہ پانی میں چلی جاتی ہے۔

تعبیر:۔آپ کے خواب سے اندازہ ہوتا ہے کہ آپ اپنے خاندان سے تعلقات منقطع کیے ہوئے ہیں۔ اگرچہ دلی طور پر آپ بہتری چاہتے ہیں مگر آپ کی کوششیں بارآور نہیں ہو رہیں۔ مچھلی کو کنارے پر رکھنا اس بات کی علامت ہے کہ آپ کے اندر تعلقات کو استوار کرنے کی خواہش موجود ہے مگر آپ اس میں غیر جانبدار رہتے ہیں۔ آپ کو چاہیے کہ گھر والوں کی ہدایت پر پوری طرح عمل کریں اور ان کو خوش رکھنے کی کوشش کریں۔

سورج کے گرد بادل
سید احمد حسین، پتوکی
خواب-: میں نے دیکھا کہ میں اپنے گھر میں چھت کے اوپر کھڑا ہوتا ہوں ۔ اتنے میں میری نظر سورج کی طرف پڑتی ہے تو میں نے دیکھا کہ سورج کے اوپر ایک بادل کا ٹکڑا ہوتا ہے جو اس کی روشنی کو مدھم کر رہا ہوتا ہے۔ سورج بالکل ابر آلو ہو جاتا ہے اور اس کی تیز دھو پ بالکل اندھیروں کی طرح ہو جاتی ہے۔ میں اس ابرآلود سورج کو دیکھ کر بہت حیران ہوتا ہوں کہ سورج کی روشنی شاید بالکل ختم ہو جائے گی۔ میں اسی سوچ میں تھا کہ میری آنکھ کھل جاتی ہے۔

تعبیر-: یہ خواب اس بات کو ظاہر کرتا ہے کہ اللہ نہ کرے کوئی پریشانی یا غم درپیش ہو سکتا ہے جس سے آپ کا دل غمگین ہو سکتا ہے اور فکر و اندیشہ کا حصول بھی ہو سکتا ہے۔ کام اور کاروبار میں رکاوٹ آسکتی ہے جس سے مال اور وسائل میں بھی کمی ہو سکتی ہے ۔ پریشانی کی وجہ سے گھر میں آرام اور سکون نہیں رہے گا۔ کاروباری لوگ آپ سے تعاون بہت کم کر سکتے ہیں۔ آپ نماز پنج گانہ ادا کیا کریں اور کثرت سے ہر نماز کے بعد استغفار کیا کریں اور کچھ صدقہ اور خیرات بھی کریں۔

سسرآم دیتا ہے
فردوس، ملتان
خواب-: میں نے دیکھا کہ میں اپنی بیوی کو ملنے کے لئے گائوں جاتا ہوں، میرے سسر بھی وہاں ہوتے ہیں وہ مجھے وہاں پر دیکھ کربہت خوش ہوتے ہیں، بچے بھی آ جاتے ہیں۔ میرے سسر اپنے ملازم سے آموں کی دو پیٹی منگوا کر مجھے دیتے ہیں اور خود بس سٹینڈ پر آتے ہیں۔ ان کا ملازم بھی ساتھ تھا جس نے دونوں آموں کی پیٹیاں اٹھائی ہوئی تھیں۔ پھر میرے سسر نے دونوں آموں کی پیٹیاں بس کے اندر رکھ دیں اور ہم بھی بچوں کے ساتھ بس میں بیٹھ جاتے ہیں ۔ پھر میری آنکھ کھل جاتی ہے۔

تعبیر-: اچھا خواب ہے جو اس بات کو ظاہر کرتا ہے کہ اللہ تعالیٰ کی مہربانی سے اگر آپ کی بیگم حاملہ ہے تو اللہ تعالیٰ آپ کو بیٹے سے نوازے گا۔ گھر میں آرام اور سکون ملے گا۔ کاروبار میں ترقی ہو گی ۔ آپ کے رزق میں اضافہ ہو گا۔ آپ کے مال اور وسائل میں بھی بہتری آئے گی ۔ کسی بزرگ سے آپ کو روحانی فیض بھی مل سکتا ہے۔ آپ نماز پنجگانہ ادا کیا کریں اور کثر ت سے یاشکور یا حفیظ کا ورد بھی کریں ۔ اگر ہو سکے تو کچھ صدقہ اور خیرات بھی کریں۔

بیٹے کا غبارے سے کھیلنا
خالد احمد ،شیخوپورہ
خواب: میں نے دیکھا کہ میں دفترسے واپس آتا ہوں تو میرا بیٹا میرے کمرے میں آتا ہے اور اس کے ہاتھ میں سرخ رنگ کا غبارہ ہوتا ہے۔ اس غبارے میں ہوا بھری ہوئی ہوتی ہے اور وہ دھاگہ سے بندھا ہوا ہوتا ہے ۔غبارہ کافی اوپر تک جاتا ہے۔ میں اس کے ہاتھ سے غبارہ پکڑ لیتا ہوں۔ مگر میرا بیٹا میرے ہاتھ سے چھیننے کی کوشش کرتا ہے۔ میں جلدی سے غبارہ اس کے حوالے کردیتا ہوں تو پھر میری آنکھ کھل جاتی ہے۔

تعبیر: اچھا خواب ہے جو اس بات کو ظاہر کرتا ہے کہ اللہ تعالی کی مہربانی سے آپ کو اپنے بیٹے سے راحت اور آرام ملے گا۔ آپ کے کاروبار میں اضافہ ہوگا جس سے آپ کے مال اور وسائل میں بھی بہتری آئے گی۔ رزق میں اضافہ ہوگا۔ گھر میں آرام اور سکون ملے گا۔ آپ نماز پنجگانہ ادا کیا کریں اور کثرت سے یاحی یا قیوم کا ورد بھی جاری رکھیں اور کچھ صدقہ اور خیرات بھی کریں۔