پاکستان کے ساتھ تعلقات درست سمت گامزن ہیں روس

فوجی،دفاعی روابط مستحکم ہوئے،تجارتی حجم بڑھانے کی گنجائش موجودہے،سفیر

نوید معراج May 12, 2018

روسی تاجر توانائی، ریلوے، ٹیلی مواصلات اورآئی ٹی میں سرمایہ کاری کرناچاہتے ہیں۔ فوٹو: فائل

پاکستان میں روس کے سفیرالیکسی دیدوف نے کہا ہے کہ پاک روس تعلقات درست سمت میں گامزن ہیں۔

روس کے قومی دن اور پاک روس سفارتی تعلقات کی70ویں سالگرہ کے موقع پراستقبالیہ سے خطاب کرتے ہوئے پاکستان میں روس کے سفیرالیکسی دیدوف نے کہا ہے کہ پاک روس تعلقات درست سمت میں گامزن ہیں جب کہ ملٹری ٹو ملٹری، دفاع، اقتصادی اور تجارتی روابط تیزی سے مستحکم ہورہے ہیں، آنے والے دنوں میں باہمی تعاون میں بھی مزیداضافہ ہوگا۔ وزیردفاع خرم دستگیر خان اس موقع پرمہمان خصوصی تھے۔

روسی سفیر نے دونوں ملکوں کے مابین تعلقات میں مثبت پیش رفت پر اطمینان کا اظہار کرتے ہوئے کہاکہ روس پاکستان کے ساتھ ملٹری ٹوملٹری،دفاع اورتجارت سمیت دیگرشعبوں میں تعاون کو مزید فروغ دینے کا خواہاں ہے۔

انہوں نے کہا کہ اقتصادی تعلقات کے حوالے سے چیلنجز درپیش ہیں ،تجارتی حجم یقیناً دسیاب مواقع سے ہم آہنگ نہیں، زمینی فاصلے اورسوویت دورسے متعلقہ مالیاتی اقدامات سمیت بعض عوامل نے ہمارے تعلقات کو متاثر کیا ہے تاہم اقتصادی شعبے میں بے پناہ مواقع موجود ہیں۔

الیکسی دیدوف نے کہا کہ روسی کاروباری حلقے توانائی، ریلوے، ٹیلی مواصلات اورآئی ٹی کے شعبوں میںباہمی مفادپرمبنی منصوبوں پرعمل درآمدکیلیے تیارہیں۔ روس نے آف شورگیس پائپ لائن،تیل صاف کرنے کے کارخانوں کے قیام ،خام تیل اورتیل کی مصنوعات کی سپلائی ، وسائل کی تلاش،اسٹیل انڈسٹری ، ایئر ونیوی گیشن سسٹم، ڈیجیٹل ٹی وی، کے فروغ، ایئر کرافٹس،ریل کار، ٹرکوں ،میڈیکل اورزرعی آلات، پانی اور صفائی کی سہولتوں، جدیدآئی ٹی اورفارماسیوٹیکل مصنوعات کی شعبوں میں تعاون بڑھانے کیلیے متعدد تجاویز دی ہیں۔

روسی سفیر نے کہاکہ سرد جنگ کے باعث دونوں ملکوں کے درمیان تعلقات میں اتارچڑھائو آئے تاہم90 کی دہائی میں سوویت یونین کے خاتمے کے بعدتعلقات کے نئے دور کاآغاز ہوا،گزشتہ چند سال کے دوران پاک روس دوطرفہ تجارت550 ملین ڈالر سالانہ سے بڑھ گئی تاہم اس میں مزید اضافے کی گنجائش موجود ہے۔